अभिनेत्रीयद्वय रेखा थापा र पूजा शर्माले महिला सशक्तीकरणसम्बन्धी कथावस्तुमा बन्न लागेको एक फिल्ममा सहकार्य गर्ने संकेत देखिएको छ । वैशाखदेखि छायांकन सुरु हुने भनिएको फिल्मलाई आगामी तीज पर्वमा रिलिज गर्ने योजना छ ।
पटकथा लेखनको प्रारम्भिक चरणमा रहेको फिल्मको शीर्षक भने तय भइसकेको छैन । पटकथा लेखक शिवम् अधिकारीले रेखा र पूजासँगको युगल तस्वीर सार्वजनिक गर्दै नयाँ फिल्ममा सहकार्य गर्न लागेको संकेत गरेका हुन् ।
अधिकारीले तीन जना महिला पात्रलाई मुख्य भूमिकामा लिएर बनाइने फिल्ममा रेखा र पूजाबाहेक अर्की एक अभिनेत्री पनि हुने जानकारी दिए । उपासना सिंह ठकुरीलाई अर्को मुख्य भूमिकामा कास्ट गर्ने चर्चा चले पनि यसबारे निधो हुन बाँकी छ ।
फिल्मबारे लेखक अधिकारीले भने, ‘पछिल्लो समय महिलाहरुले असुरक्षित महसुस गरिरहेका छन् । उनीहरु सुरक्षा र सम्मान चाहन्छन् । यो फिल्मका मुख्य महिला पात्रहरुले त्यो प्राप्तिका लागि लड्छन् र बदला लिन्छन् ।
फिल्मका हिरो पनि उनीहरु नै हुन् । महिलाले आवाज उठाउनुपर्छ भन्ने सन्देश यसले दिन्छ । कम्तीमा एक–दुई सातामा फिल्मले पूर्ण आकार लिन्छ ।’ निर्देशक र अन्य कलाकार तय हुन बाँकी रहेको उनले जानकारी दिए ।
यस वर्षका हिट निर्देशकलाई लिएर फिल्म बनाउने तयारीमा रेखा र पूजा छन् । गत महिना रेखाले वैशाखदेखि फिल्म छायांकन सुरु हुने बताएकी थिइन् ।
घरेलु फिल्ममा महिला केन्द्रित चरित्रको जग बसालेकी रेखाले पछिल्लो समय नारी प्रधान फिल्म निर्माण गरिरहेकी छन् ।रेखा र पूजाले सहकार्य गर्ने भएपछि फ्यानमाझ पनि चर्चा चुलिएको छ ।
