लाल सिंह चड्ढाको बक्सअफिसमा असफलतापछि आमिर खानले फिल्मबाट ब्रेक लिएका छन् । गत वर्ष अभिनेताले च्याम्पियन्स फिल्मको घोषणा गरेका थिए तर त्यो पनि अलपत्र परेको छ ।यसैबीच आमिर छिट्टै काममा फर्किने खबरहरु आइरहेका छन् ।
आमिरले सन् २००८ को सुपरहिट रिभेन्ज ड्रामा फिल्म गजनीको सिक्वेल बनाउन लागेका हुन् । यतिबेला उनी फिल्मको बारेमा निर्मातासँग छलफल पनि गरिरहेका छन् । यद्यपि यस विषयमा आमिरको तर्फबाट आधिकारिक जानकारी भने आएको छैन ।
पिपिङमुनको रिपोर्ट अनुसार आमिर खान गजनी २ को लागि दक्षिणतर्फ लागेका छन् । उनी अभिनेता अल्लु अर्जुनका पिता अल्लु अरविन्दसँग काम गर्न चाहन्छन्, त्यसैले उनीसँग कुरा गर्न उनी धेरै पटक हैदराबाद गएका छन् ।
फिल्मलाई लिएर यी दुईबीच छलफल चलिरहेको छ । स्रोतका अनुसार गत हप्ता पनि आमिर खानले अल्लु अरविन्दलाई भेटेका थिए । दुवै सँगै काम गर्न निकै उत्साहित छन् । स्रोतका अनुसार अल्लु अरविन्द र आमिरबीच ४–५ महिनादेखि पटक–पटक भेट हुँदै आएको छ ।
तर छलफलसँग सम्बन्धित सबै कुरा गोप्य राखिएको छ । यस परियोजनाबारे अझै केही पुष्टि भएको छैन। आमिर र अल्लु अरविन्द दुवै सञ्जय सिंघानियाको कथालाई अगाडि बढाउन चाहन्छन् र केही महिनामा स्क्रिप्ट फाइनल गर्ने बताइएको छ ।
रिपोर्टको विश्वास गर्ने हो भने, आमिर खानलाई अहिले फिल्म उद्योगबाट धेरै अफर आइरहेका छन् । बलियो कन्टेन्ट ड्रामाका लागि स्नेहा रजनीसँग कुराकानी भइरहेको बताइएको छ ।
उनलाई एनटीआर जुनियरसँग प्रशान्त नीलको प्यान इन्डिया चलचित्र अफर गरिएको छ । आमिरसँग यस परियोजनाको बारेमा पनि कुराकानी भइरहेको छ।
