प्रतिष्ठित अमेरिकी म्यागजिन टाइमले बलिउड अभिनेत्री दीपिका पादुकोणलाई ‘ग्लोबल स्टार’ भन्दै उनीमाथि कभरस्टोरी छापेको छ । उनी टाइमको कभरमा प्रकाशित हुने पछिल्लो विश्व सेलिब्रिटी हुन् । उनले आफ्नो कामबाट विश्वलाई बलिउडमा ल्याउने श्रेय दिएको समेत उल्लेख छ ।
सन् २०१८ मा म्यागजिनले प्रकाशित गरेको विश्वका १०० प्रभावशाली व्यक्तिको सूचीमा दीपिका पनि समावेश थिइन् । टाइमले आफ्नो अन्तर्वार्तामा दीपिकालाई ‘विश्वको सबैभन्दा बढी जनसंख्या भएको देशको सबैभन्दा लोकप्रिय अभिनेत्री’ भनेर चिनाएको छ ।
कभरमा उनी बेज ओभरसाइज सुटमा देखिएकी छन् भने जुत्ता लगाएकी छैनन् । अन्तर्वार्तामा दीपिकाले आफूविरुद्धको ‘निरन्तर राजनीतिक प्रतिक्रिया’को बारेमा कुरा गरेकी छिन् । उनले भनेकी छन्, ‘मलाई थाहा छैन म यसबारे केही महसुस गर्छु कि भनेर ।
तर सत्य यो हो, मलाई यसमा केही लाग्दैन ।’ यसअघि दीपिकाको फिल्म ‘पद्मावत’लाई करणी सेनाले विरोध गरेको थियो । भीडले आक्रमण गरेका विद्यार्थीप्रति ऐक्यबद्धता व्यक्त गर्न जवाहरलाल नेहरू विश्वविद्यालयको उनको भ्रमणले हंगामा मच्चाएको थियो भने फिल्म ‘पठान’को गीत ‘केशरी रङ’मा उनले लगाएको बिकिनीमाथि धेरै चर्चा र बहस भएको थियो । फिल्मलाई बहिष्कार गर्नुपर्ने आवाज पनि उठ्यो ।
दीपिकाले ओस्कारमा भारतको हालैको प्रदर्शनको बारेमा पनि बताइन्, जहाँ उनी पनि प्रस्तुतकर्ताको रूपमा सामेल भएकी थिइन् । ओस्कारमा तेलुगू फिल्म ‘आरआरआर’को ‘नाटु नाटु’ सर्वोत्कृष्ट मौलिक गीत र गुनित मोंगाको ‘द एलिफ्यान्ट व्हिस्पर्स’ले उत्कृष्ट डकुमेन्ट्री विधामा अवार्ड जित्यो ।
दीपिकाले हामी यतिमा मात्र सन्तुष्ट हुनुहुँदैन भन्ने बताएकी छन् । ‘मलाई लाग्दैन कि हामी एउटा गीतको लागि एक ओस्कार र वृत्तचित्रको लागि एक ओस्कारमा खुसी हुनुपर्छ,’ उनले भनिन्, ‘मलाई आशा छ कि हामीले यसलाई अवसरको सुरुवातको रूपमा हेर्न सक्छौं ।’
दीपिका आगामी एक्सन थ्रिलर फिल्म ‘प्रोजेक्ट के’मा अभिनेता प्रभासको अपोजिटमा देखिनेछिन् । उनीसँग सिद्धार्थ आनन्दको अर्को एक्सन थ्रिलर फिल्म ‘फाइटर’ ऋतिक रोशनको साथ पाइपलाइनमा छ ।
यो वर्षको सबैभन्दा ठूलो हिट ‘पठान’ दिएपछि सिद्धार्थ आनन्दसँग उनको यो दोस्रो फिल्म हो । अर्को वर्ष जनवरी २५ मा रिलिज हुने भनिएको ‘फाइटर’मा करण सिंह ग्रोवर र अक्षय ओबरायको पनि अभिनय रहनेछ ।
