कात्तिक ११ गतेदेखि प्रदर्शन हुन गइरहेको फिल्म ‘महापुरुष’ यतिबेला ‘मोफसल भ्रमण’मा छ । हरिवंश आचार्यसहितका कलाकार देशका प्रमुख सहरमा दर्शकलाई फिल्म हेर्न आग्रह गरिरहेका छन् ।
उनीहरु फिल्मका अन्य कलाकार र निर्देशकीय टोली पनि दर्शक फकाउँदै छन् । कन्सर्ट, कमेडी र पत्रकार सम्मेलन गर्दै फिल्मले टुर गरिरहेको छ । पूर्वी नेपालको विर्तामोडदेखि सुरु भएको भ्रमण इटहरी, हेटौंडा, नारायणगढ हुँदै बुटवलसम्म पुगेको छ ।
पोखरा र काठमाडौंमा पनि कार्यक्रम हुँदैछ । नारायणगढमा आयोजित पत्रकार सम्मेलनमा कार्यकारी निर्माता एवं अभिनेता रविन्द्रसिंह बाँनियाले ‘महापुरुष’ कथाको जन्म देवघाटबाट सुरु हुने बताए ।
देवघाटका एक ‘बा’ को कथाबाट प्रभावित भएर ‘महापुरुष’ को कथा सिर्जना भएको उनले जनाए । आमाको कथामा धेरै चलचित्र बनेको बताउँदै ‘महापुरुष’ बुवाको कथामा केन्द्रित रहेको उनले बताए ।
फिल्ममा उठान गरिएको कथालाई बलियो बनाउन मिहिनेत गरिएको उनले बताए । राम्रो विषयवस्तुमा चलचित्र निर्माण गरे चल्छ भन्ने उदाहरण ‘महापुरुष’ ले दिने उनको विश्वास छ ।
लेखक तथा निर्देशक प्रदीप भट्टराईले परिवारसँगै रहे पनि सन्तानले समय नदिंदा बुवाआमाले कसरी एक्लोपन महसुस गर्छन् भन्ने कथा फिल्मको माध्यमबाट देखाउन खोजिएको बताए ।
‘हामीले फिल्मलाई स्वादिष्ट बनाउन खोजेका छौं । ११ गतेपछि प्लेटमा पस्किन्छौं । सबैले मीठो मान्नु हुनेछ भन्ने विश्वास छ,’ उनले भने । अभिनेता आचार्यले लामो समयपछि ‘महापुरुष’ मार्फत गम्भीर भूमिकामा अभिनय गर्ने अवसर पाएको बताए ।
‘बलिदान’पछि पहिलोपटक यस फिल्ममार्फत गम्भीर भूमिका निर्वाह गर्ने अवसर पाएको उनले बताए । बलिदानपछि महापुरुष आफ्नो लागि उत्कृष्ट हुने उनको विश्वास छ । फिल्मले हँसाउदा हँसाउदै रुवाउने र रुवाउँदा रुवाउँदै हँसाउने हरिवंश बताउँछन् ।
डेब्यु कलाकार अरुण क्षेत्रीले सामाजिक कथामा काम गर्ने इच्छा ‘महापुरुष’ बाट पूरा भएको बताए । डेब्यु गर्ल अन्जना बराइलीले फिल्ममा राम्रो काम गर्ने प्रयास गरेको बताइन् ।
म्याक्स दीपेश खत्री निर्मित फिल्ममा मदनकृष्ण श्रेष्ठ, गौरी मल्ल, राजाराम पौडेलको समेत अभिनय छ । दीपक बज्राचार्यले खिचेको फिल्मलाई मित्र गुरुङले सम्पादन गरेका हुन् । फिल्मको ट्रेलर र दुई गीत सार्वजनिक भइसकेका छन् ।
