फिल्म ‘कबड्डी ४’ को सुटिङमा हिम पहिरोले अवरोध पुर्याएको छ । फिल्मको आइतबार बिहान मुस्ताङको सुटिङमा हिम पहिरोले अवरोध पुर्याएको हो । हिम पहिरो खसेपनि फिल्म युनिट कसैलाई नोक्सान नपुर्याएको फिल्मका निर्देशक रामबाबु गुरुङले बताए ।
‘हामी बिहानैदेखि फिल्म सुटिङ गर्दै थियौ । सुटिङ स्थल हिम पहिरो खसेको स्थानभन्दा केही पर थियो’ निर्देशक गुरुङले भने, ‘हिम पहिरो खस्न थालेपछि हामीले पनि सुटिङ स्थगित गर्यौ ।’ हिम पहिरोका कारण स्थानीयको सुझावमा निर्माणको पुरै युनिटसहित आफुहरु सुरक्षित स्थानमा सरेको गुरुङले सुनाए ।
हिम पहिरोका कारण आइतबार सुटिङ रोकिए पनि आजबाट फेरि छायाङ्कन सुरु भएको निर्देशक गुरुङले जानकारी दिए । ‘हिम पहिरो होला आज बिहान ढिलो मौसम खुल्यो’ गुरुङले भने, ‘अहिले भने फिल्मको छायाँकन धमाधम भइरहेको छ ।’
गुरुङले यस अगाडि ‘कबड्डी’ का ३ सिरिज मुस्ताङमै छायाँकन गरेका थिए । ‘कबड्डी ४’ मा दयाहाङ राई, बुद्धि तामाङ, सौगात मल्ल, विजय बराल, मिरुना मगर लगायतका कलाकारको अभिनय देख्न सकिन्छ । फिल्मको छायाँकन अझै १० दिनसम्म मुस्ताङमै हुनेछ ।
