अन्त्यानुप्रास मिलेका चार पंक्ति लेख्दै अभिनेता तथा फिल्म निर्माता दीपकराज गिरीले फेसबुकमा उद्घोष गरे, ‘आफ्नो भोट खेर फाल्दिनँ, ६० काटेकालाई हाल्दै हाल्दिनँ ।’ त्यसो त समसामयिक कुरामा उग्रै चासो दिने कलाकार हुन्, दीपकराज गिरी ।
उनको यस्तो चासो सामाजिक सञ्जालमा छ्यापछ्याप्ती हुने गर्छ । चुनावी सरगर्मी बढ्दै जाँदा उनले जुन स्टाटस राखे, त्यसले राजनीतिप्रति उनको स्वभाविक चासो र धारणा व्यक्त भएको छ ।
तर सार्वजनिक व्यक्तित्व बनाइसकेका अभिनेता गिरीले ‘६० काटेकालाई हाल्दै हाल्दिनँ’ भन्ने कुरा आफैंमा कति व्यावहारिक र समझदारीपूर्ण छ त ?गिरीको बुझाइमा सरकारको नेतृत्व ‘उमेर भएकाहरुले’ गर्नुपर्छ ।
उनी भन्छन्, ‘पार्टीको नेतृत्व बुढापाकाले गर्दा पनि हुन्छ । तर सरकार चलाउन उनीहरु योग्य छैनन् । सक्षम छैनन् । अरु त परको कुरा, शालिकमा माला चढाउनसम्म नसक्ने, हातखुट्टा काँप्ने नेताहरु सरकारमा छन् ।
सरकारका लागि दौडधुपमा छन् । उनीहरुले घाँटीमा लगाउनुपर्ने माला खुट्टामा पुग्ने अवस्था छ ।’ बुढापाकाहरुको यस्तो दौडधुपले युवाहरु अवसरबाट वञ्चित भएको उनको बुझाइ छ । युवाहरु नेतृत्वमा आए आशावादी हुन सकिने गिरी बताउँछन् ।
‘बुढाहरुले भन्दा उनीहरुले केही न केही त गर्छन्,’ अभिनेता गिरी भन्छन् । अभिनेता गिरीको भनाइमा उमेरले बुढो भइसकेपछि शरीर जीर्ण हुँदै जान्छ । जीर्ण भएपछि तीक्ष्ण बुद्धि हुँदैन ।
उनको तर्क छ, ‘यदि उमेरको अर्थ हुँदैनथ्यो भने सरकारले कर्मचारीलाई किन उमेर पुगेपछि सेवा निवृत्त गरी घर पठाउँछ ?’ यसको अर्थ उमेर ढल्किंदै गएपछि मान्छेको कार्यक्षमता र कार्यशैलीमा हस आउँछ भन्ने उनको भनाइ छ ।
अभिनेता गिरी भन्छन्, ‘त्यसैले उमेर ढल्केकाहरुलाई भोट दिइरहन पर्दैन भन्न खोजेको हुँ । उनीहरुलाई अभिभावकको भूमिकामा बस्नुहोस् भनेको हुँ । युवापुस्ताले प्रधानमन्त्री बन्न ८० वर्ष कुर्नुपर्ने अवस्था छ । यो अवस्थाको अन्त्य हुनुपर्छ भन्न खोजेको हुँ ।’
यद्यपि विश्व राजनीतिको परिदृश्य उनले बुझेभन्दा फरक छ । दुई छिमेकी मुलुक चीन र भारतका कार्यकारी प्रमुख उमेरले ७० वर्षको हाराहारीका हुन् । भारतीय प्रभानमन्त्री नरेन्द्र मोदी ७० वर्षका हुन् भने चीनका राष्ट्रपति सी जिनपिङ ६९ वर्षका भए ।
उता अमेरिकी राष्ट्रपति जो बाइडेनको उमेर ७९ वर्ष छ । यसरी खोज्दै जाने हो भने कतिपय मुलुककका कार्यकारी प्रमुख उमेरले ८० वर्ष माथिका छन् । अभिनेता गिरी भन्छन्, ‘मेरो आसय जोश जाँगर भएका युवालाई प्रत्यक्ष चुनावमा पठाएर तपाईंहरु बरु पार्टीका काममा लाग्नुहोस् ।
युवालाई साथ र सहयोग गरेर काम गर्ने अवसर दिनुहोस् भनेको हुँ ।’ उमेरले साथ नदिएपछि हाम्रा नेताहरुको कार्यक्षमता शिथिल एवं कमजोर भएको उनको प्रष्टीकरण छ । अभिनेता गिरी भन्छन्, ‘आफ्नो शरीर नै काबुमा राख्न नसक्ने नेताले काम गर्न सक्दैनन् । काम गर्नका लागि शरीरले पनि साथ दिनुपर्छ ।’
अभिनेता गिरी थप्छन्, ‘६० वर्ष पार गरेकाले सरकारको नेतृत्व नगर्नुहोस् । किनभने सरकारको नेतृत्व गर्ने काम जोश जाँगर भएका युवालाई दिनुहोस् ।’यहाँ ओशोको भनाइ सान्दर्भिक हुन्छ । ओशो भन्छन्, ‘युवा हुनु उमेरसँग खास सरोकार राख्दैन ।’
युवापन त्यस्तो गुण हो, जसमा गतिशीलता, जागरुकता, उत्सुकता, सक्रियता हुन्छ । साथै युवाहरु सधैं आशावादी हुन्छन् । सकारात्मक हुन्छन् र रचनात्मक पनि । जसरी उमेर ढल्किंदै गएपछि राजनीतिक नेतृत्वमा परिवर्तन आउनुपर्छ भन्ने अभिनेता गिरीको बुझाइ छ, के यो अरु सबै क्षेत्रमा लागु हुन्छ ?
अभिनेता गिरी भन्छन्, ‘उमेर हदको कुरा हरेक क्षेत्रमा लागु हुन्छ । कलाकारितामा पनि निश्चित उमेर हुनुपर्छ । उमेर सुहाउँदो काम गर्नुपर्छ । उमेरले गर्न नसक्ने काम मन लागे पनि गर्न सकिंदैन ।’
उनी थप्छन्, ‘म कलाकार हुँ । मेरो उमेर बगैंचामा भर्खरका हिरोइनसँग नाच्ने, मायाप्रेमका कुरा गर्ने होइन । यस्ता कुरा मलाई सुहाउँदैन । मलाई उमेर र शरीरले दिंदैन । हरेकले उमेर अनुसारको भूमिका निभाउनुपर्छ ।’
