ईस्वर दुलाल
झापा। लघुवित्त संस्थाको ज्यादतीबाट पीडितहरुको सङ्घर्ष समिति कोशी प्रदेश स्तरीय भेलामा बोल्दै केन्द्रिय अध्यक्ष मणिराम ज्ञवालीले माग पुरा नभए अनसनमा बस्ने घोषणा गर्नुभएको छ । शनिबार झापाको कमलगाउँपालिका स्थित गुरागाईँ भवनमा सङ्घर्ष समितिका केन्द्रिय अध्यक्ष ज्ञवालीले सो कुरा घोषणा गर्नु भएको हो ।
कार्यक्रममा बोल्दै समितिका अध्यक्ष मणिराम ज्ञवालीले समूह सदस्य कुनै कारण एक सदस्यले किस्ता तिर्न नसकेको अवस्थामा सम्पूर्ण सदस्यको बचत वा ऋण बनाएर उक्त सदस्यको रकम असुल गर्ने प्रावधान गलत रहेको छ । मासिक किस्ता असुली गर्दा एक÷दुई दिन पनि पर्खिन नसक्नु, सदस्यको सामाजिक बदनाम गर्नु, आत्महत्या गर्न प्रेरित गर्नु, गाली बेइज्जत गर्दै कर्मचारीले विभिन्न नाममा धम्काउने र ज्यादतीको कारण महिला दिदी बहिनीबीच द्वन्द्व सिर्जना हुनुले सामूहिक ऋण मिनाहा गर्नुपर्ने कुरा व्यक्त गर्नुभयो ।
“बाँचौँ, बचाऔँ र अघि बढौँ”, “लघुवित्तिय संस्थाको ज्यादतीको विरुद्धमा एक भएर जुटौँ” भन्ने मुख्य नारा बोकेर हिँडेको सङ्घर्ष समितिले देश भरिका पिडीतहरलाई एकबद्ध बनाएर न्यायको निम्ति अघि बढिरहेको छ । भेलामा कोशी प्रदेश अध्यक्ष शशिला थापा, झापा जिल्ला अध्यक्ष लुना राई, मोरङ अध्यक्ष ईश्वर खवास, उदयपूर अध्यक्ष बिना मगर, सुनसरी अध्यक्ष कुलसिम खातुन, लगायतको उपस्तिथि रहेको थियो ।
कार्यक्रममा बोल्दै वक्ताहरुले सरकारले लघुवित्तीय संस्थाद्वारा लगाइएको सामूहिक ऋण मिनाहा गरिनुपर्ने, आम गरिब किसानलाई निःशुल्क ऋण प्रदान गर्नुपर्ने, आवश्यकता र क्षमतामा आधारित काम र दामको व्यवस्था गर्नुपर्ने, समाजवादी अर्थतन्त्रको विकास गर्नुपर्ने लगायतको माग गरेका छन् ।
लघुवित्त संस्थालाई कम्पनी ऐनमा दर्ता गरेर परिचालन गर्ने गरी नीति बनाउनु नै गलत भएको सङ्घर्ष समितिको भनाइ रहेको छ ।
कार्यम्रममा हजारौँको संख्यामा लघुवित्त संस्थाबाट पिडित महिला दिदि बहिनीहरुको उपतिथि रहेको थियो ।
