प्रेमप्रसाद भटराई (के.डि)
पथरी । मोरङको पथरीशनिश्चरेमा हुन गइरहेको प्रदेश नं १ स्तरीय दोस्रो सि. एम. कन्दङ्वा क्रिकेट प्रतियोगिताको तयारी पूरा भएको छ । पथरीशनिश्चरे क्रिकेट क्लबको आयोजनामा हुने सो प्रतियोगिताको मुख्य प्रायोजक पथरीको एभरेष्ट अंग्रेजी आवासीय मावि रहेको छ भने टिका फेन्सी स्टोर, पथरीशनिश्चरे नगरपालीका, ट्रु भ्याली र वल्र्ड्लिंक प्रायोजकको रुपमा रहेका छन् ।
‘स्वास्थ्यका लागि खेलकुद, राष्ट्रका लागि खेलकुद’ भन्ने मूल नाराका साथ भोलि (जेठ ११गते) देखि हुने प्रतियोगिता १८ गतेसम्म चल्नेछ । प्रतियोगिता पथरी रंगशालामा हुने भनेर प्रचार गरिए पनि अन्तिम अवस्थामा पथरीशनिश्चरे– १० को जिरीखिम्ती खेलमैदानमा हुने भएको छ । सो प्रतियोगितामा झापा, मोरङ र सुनसरीका १६ वटा टिमले सहभागिता जनाउनेछन् । उद्घाटन खेलमा मोरङ विराटनगर क्रिकेट क्बल र झापाको अर्जुनधारा क्रिकेट क्लब बीच खेल हुने आयोजकका एन्जल राईले जानकारी दिए ।
प्रतियोगितामा प्रथम पुरस्कार ५५ हजार ५ सय ५५ दोश्रो पुरस्कार ३३ हजार ३ सय ३३ का साथ ट्रफि, मेडल र प्रमाणपत्र रहेको छ , त्यस्तै बेस्ट बलर, बेस्ट ब्याट्सम्यान, मेन आफ द सिरिज ले २ हजार ५ सय ५५ का दरले र प्रत्येक खेलका म्यान अफ द म्याचले नगद १ हजार १ सय ११ का साथ ट्रफी नगद प्राप्त गर्नेछन् । एभरेष्ट बोर्डिङका निर्देशक रविन कन्दङवाले आफ्ना स्वर्गिय पिता सि.एम कन्दङ्वाको स्मृतिमा विभिन्न कार्यक्रमहरु गर्दै आइरहेका छन् ।
