क्रेजी साप्ताहिक
पथरी । डोटीको एक वडा कार्यालयमा अज्ञात समूहले आगजनी गरेको छ । शिखर नगरपालिका–७ को वडा कार्यालयमा गएराति अज्ञात समूहले आगजनी गरेको हो । अज्ञात समूहले शिखरनगरपालिका–७ को वडा कार्यालयमा आगजनी गरेको जिल्ला प्रहरी कार्यालय डोटीका सूचना अधिकारी प्रहरी नायव उपरीक्षक लालबहादुर धामीले जानकारी दिए । आगलागीको सूचना पाएलगत्तै प्रहरी घटनास्थल पुगिसके पनि क्षतिको विवरण आउन बाँकी रहेको उनले बताए ।
आगलागीबाट वडा कार्यालयको भवन पूर्ण रुपमा क्षति भएको स्थानीय टिकाराम भण्डारीले जानकारी दिए । आगो कसले र किन लगायो भन्ने खुलेको छैन ।डोटीमा वडा कार्यालयमा आगजनी भएको यो तेस्रो घटना हो । यसअघि जेठ १४ गते बडीकेदार गाउँपालिका वडा नं. ४ मान्नाकापडीको वडा कार्यालयमा आगजनी भएको थियो । त्यस्तै, श्रावण ७ गते जोरायल गाउँपालिका–४ को वडा कार्यालयमा पनि आगजनी भएको थियो । यी दुवै वडा कार्यालयको आगजनीमा संलग्नको अझै पहिचान हुन सकेको छैन ।
