बाबर आजामको शानदार शतकलाई छायामा पार्दै जेम्स भिन्सले करियरकै पहिलो एकदिवसीय शतक बनाएपछि घरेलु टिम इंग्ल्यान्डले पाकिस्तानविरुद्धको तेस्रो खेल जित्दै तीन खेलको एकदिवसीय क्रिकेट सिरिज क्लिन स्विप गरेको छ ।
मंगलबार राति भएको तेस्रो तथा अन्तिम खेलमा इंग्ल्याण्डले पाकिस्तानलाई ३ विकेटले पराजित गर्दै सिरिज आफ्नो जितेको हो । पाकिस्तानले दिएको ३३२ रनको उच्च लक्ष्य इंग्ल्यान्डले ४८ ओभरमा ७ विकेट गुमाएर पूरा गरेको हो ।
इंग्ल्यान्डको जितमा नायक बनेका जेम्स भिन्सले १०२ रन बनाए । उनले ९५ बल खेल्दै ११ छक्का प्रहार गरे । यस्तै लेविस ग्रेग्रोरीले ७७ रन योगदा गर्दा ज्याक क्रलीले ३९, फिल साल्टले ३७ र कप्तान बेन स्टोक्सले ३२ रन जोडे ।
पाकिस्तानका हरिस राउफले ४ विकेट लिए भने शादब खानले २ विकेट लिए । त्यसअघि पहिले ब्याटिङ गरेको पाकिस्तानले कप्तान बाबरको शानदार शतकमा ५० ओभरमा ९ विकेट गुमाएर ३३१ रन बनाएको थियो ।
बाबर आजमले १३९ बल खेल्दै १४ चौका र ४ छक्का मद्दतमा १५८ रन बनाए । यस्तै मोहम्मद रिजवानले ७४ र इमाम उल हकले ५६ रनको योगदान दिए । इंग्ल्यान्डका ब्राएडन कार्स एक्लै ५ विकेट लिए भने सकिब मोहमुदले ३ विकेट लिए ।
यसअघि इंग्ल्याण्डले पहिलो खेल ९ विकेटले र दोस्रो खेल ५२ रनले जितेको थियो । इयान मवर्गनको कप्तानीमा रहेको टिमका केही सदस्यलाई कोरोना संक्रमण भएपछि इंग्ल्याण्डले बेन स्टोक्सको कप्तानीमा अर्को टिम नै घोषणा गरेर यो सिरिज खेलाएको थियो।
