एक तथ्याङ्कअनुसार विश्वमा वर्षेनी ५ लाख फिल्म बन्छन् । भारतमा मात्र एक वर्षमा २४०० पूर्ण लम्बाइका (दुई घण्टा भन्दा लामो) फिल्म बन्छन् ।
सन् २०२१ मा विश्वभर फिल्मको बजार २१.४ अर्ब डलर रहेको छ । यो रकम फिल्मले वर्षभरि प्रदर्शनमा आउँदा कमाएको कुल रकम हो । र तथ्याङ्क कोरोना महामारी सुरु भएपछिको हो ।
विश्व फिल्म बजारमा चीनको हिस्सा मात्र ७.३ अर्ब अमेरिकी डलर छ, अर्थात विश्व फिल्म बजारको झण्डै एक तिहाई हिस्सा चीन एक्लैको छ । पहिलो स्थानमा रहेको चीनमा वर्षमा औसत ८५० फिल्म प्रदर्शन हुन्छन् ।
दोस्रो स्थानमा अमेरिकी बजार रहेको छ । त्यहाँ वर्षमा औसतमा ८०० फिल्म रिलिज हुन्छ । र सन् २०२१ मा अमेरिकामा रिलिज भएका फिल्मले ४.५ बिलियन डलर कमायो । दशकौंसम्म अमेरिका विश्वको पहिलो फिल्म बजार थियो । सन् २०२० पछि चीनले उसलाई उछिनेर पहिलो बनेको हो । त्यस यता उसले अमेरिकालाई धेरै पछाडि छाडिसक्यो ।
जापान ठूलो फिल्म बजारको सूचीमा तेस्रो स्थानमा छ । १.५ अर्ब डलरसहित तेस्रो स्थानमा रहेको जापानमा वार्षिक ८५० वटा फिल्म लगभग रिलिज हुन्छन् । चौथो ठूलो फिल्म बजार बेलायत तथा आयरल्याण्ड हुन् । सन् २०२१ मा यस भूभागमा प्रदर्शनमा आएको फिल्मले ८० करोड डलर कमायो । यहाँ वर्षमा औसत २८० फिल्म प्रदर्शन हुन्छन् ।
विश्वको पाँचौ ठूलो फिल्म बजार फ्रान्स हो । औसतमा वर्षेनी ३०० फिल्म प्रदर्शनमा आएको यस भेगमा सन् २०२१ मा फिल्महरूले ८० करोड डलर कमाई गरे । छैटौं ठूलो फिल्म बजारमा रुसको नाम छ । वर्षमा औसत १०० फिल्म प्रदर्शनमा आउने यो मुलुकमा सन् २०२१ मा फिल्महरूले ६० करोड डलर उठाए ।
सातौं स्थानमा दक्षिण कोरिया छ । वर्षमा औसत ३५० वटा फिल्म प्रदर्शनमा आउने यो बजारमा ५० करोड डलर फिल्मले उठाउँछन् । विश्वकै धेरै फिल्म बन्ने मुलुक भारत बजारको हिसाबमा भने सूचीको आठौं स्थानमा छ । वर्षमा २४०० फिल्म प्रदर्शनमा आउने भारतमा सन् २०२१ मा भारतमा ती फिल्मले ५० करोड डलरको कमाई कमाइ गर्यो ।
अस्ट्रेलिया यस सूचीको नवौं स्थानमा छ । सन् २०२१ मा रिलिज भएका कुल ५० फिल्मले अस्ट्रेलियामा ५० करोड डलर कमायो । जर्मनी ठूला फिल्म बजार भएको मुलुकको सूचीको दशौं स्थानमा छ । सन् २०२१ मा रिलिज भएका लगभग २५० फिल्मले जर्मनीमा ४० करोड डलर कमाइ गर्यो ।
