भारतीय क्रिकेट टिमका ब्याट्सम्यान विराट कोहलीले पर्थमा रहेको आफ्नो होटलको कोठाको भिडियो सार्वजनिक भएपछि असन्तुष्टि व्यक्त गरेका छन् । इन्स्टाग्राममा एक पोष्ट सेयर गर्दै कोहलीले खेलाडी र सेलिब्रेटीलाई मनोरञ्जनको स्रोत मात्र मान्न नहुने बताएका छन् ।
कोहलीले सेयर गरेको भिडियोमा कोहली कोठामा नभएको बेला पनि कोहलीको होटलको कोठामा कोही प्रवेश गरेको देखिन्छ । कोहलीले लेखे, ‘म बुझ्छु कि फ्यानहरू आफ्ना मनपर्ने खेलाडीहरू देखेर धेरै उत्साहित हुन्छन् र उनीहरूलाई भेट्न चाहन्छन् ।
मैले सधैं यसको प्रशंसा गरेको छु । तर यो भिडियो आहत पार्ने किसिमको छ र म मेरो गोपनीयताको बारेमा चिन्तित छु ।’ कोहलीले भने, ‘यदि मैले मेरो होटलको कोठामा पनि गोपनीयता पाउन सकिन भने, म कसरी मेरो व्यक्तिगत ठाउँको अपेक्षा गर्न सक्छु ? मलाई यस प्रकारको जुनून र गोपनीयतामा हस्तक्षेप गर्ने तरिका मन पर्दैन ।
कृपया मानिसहरूको गोपनीयताको सम्मान गर्नुहोस् र उनीहरुलाई आफ्नो मनोरञ्जनको सामान भनेर नसोच्नुहोस् ।’ अष्ट्रेलियाका खेलाडी डेभिड वार्नरले पनि कोहलीको इन्स्टाग्राम पोस्टमा प्रतिक्रिया दिएका छन् ।
वार्नरले लेखेका छन्, ‘यो हास्यास्पद छ, यसलाई कुनै पनि हालतमा स्वीकार गर्न सकिँदैन ।’कोहलीकी पत्नी अनुष्का शर्माले पनि आफ्नो इन्स्टाग्राम स्टोरीमा विराटको पोस्ट सेयर गरेकी छिन् ।
