अर्जेन्टिनाका तत्कालीन कप्तान डिएगो म्याराडोनाले सन् १९८६ को विश्वकपको क्याटरफाईनल खेलमा एक गोल हातैले गरेका थिए । ‘ह्यान्ड अफ गड’ भनेर चिनिने उक्त गोलमा जुन बला प्रयोग भएको थियो, त्यो गत बुधबार लिलाममा राखिएको थियो ।
लिलाममा बलमाथि सबैभन्दा धेरै २० लाख पाउण्ड बोली परेको थियो । तर यसको बोली लगाउने पक्ष र विक्रेताबीच थप वार्ता जारी हुँदा निष्कर्ष पुग्न सकेन । म्याराडोनाले सन् १९८६ को विश्वकपको क्वार्टरफाइनलमा मेक्सिको सिटीको एस्टाडियो एजटेकामा ‘ह्याण्ड अफ गड’सहित दुई गोल गरेर इङ्ल्यान्डलाई हराएका थिए ।
म्याराडोनाले इंग्ल्यान्डविरुद्धको पहिलो गोललाई मुक्का हानेर पोष्टमा छिराएका थिए । तर रेफ्री हातले हानेको निश्चित नहुँदा त्यसलाई गोल दिए । म्यारोडोनाले सोही खेलमा गरेको दोस्रो गोललाई भने शताब्दीकै उत्कृष्ट गोल मानिन्छ ।
नोभेम्बर २०२० मा ६० वर्षको उमेरमा बितेका अर्जेन्टिनाका प्लेमेकर म्याराडोनाले आफ्नो विवादास्पद सुरुवाती गोललाई ‘केही मात्रा आफ्नो टाउकोले र केही भगवानको हातले ’ गरेको दाबी गरेका थिए ।
सो वर्ष इङ्ल्यान्ड २–१ ले पराजित भएपछि प्रतियोगिताबाट बाहिरिएको थियो भने फाइनलमा पश्चिम जर्मनीलाई पराजित गर्दै अर्जेन्टिना विश्व च्याम्पियन बनेको थियो । अघिल्लो बुधबार ग्राहम बड अक्सनले बिक्रीमा राखेका ३०० भन्दा बढी सामानमध्ये एकको रूपमा बल पनि राखिएको थियो ।
प्रारम्भिक रुपमा २५ लाख पाउन्डदेखि ३० लाख पाउण्डमा विक्री हुने अपेक्षा गरिए पनि बलको बोली २० लाखमै रोकियो । हाल विक्रेता र इच्छुक पक्षबीच छलफल भइरहेको छ र सहमतिको अपेक्षा गरिएको छ ।
सोही खेलमा म्याराडोनाले लगाएको टीसर्ट भने मे महिनामा ७१ लाख पाउण्डमा बिक्री भएको थियो । त्यो टीसर्ट ४० लाख पाउण्डमै बिक्री हुने अपेक्षा गरिएको थियो । सन् १९८६ को खेलमा रेफ्री रहेका ट्युनिसियाली नागरिक अलि बिन नासेरसँग हालसम्म यस बलका मालिक हुन् ।
उनले यो बल अब दुनियाँका सामु साझा गर्ने बेला आएको बताए । उनले लिलामीमा जसले बल किनेपछि तिनले यसलाई सार्वजनिक प्रदर्शनीमा राखिदिए हुने अपेक्षा गरेका छन् । त्यो दिन के भएको थियो भन्नेबारेमा पनि नासेरले सुनाए ।
‘किपर र म्याराडोना बलतर्फ झम्टिएका थिए र म पछाडिबाट हेरिरहेको थिएँ । मैले प्रमाणिकरणको लागि लाईन्सम्यानलाई हरेँ । उनले गोल भएको संकेत गरेपछि मैले उक्त निर्णय गरें ।
खेल सकिएपछि इग्ल्याण्डका प्रमुख कोच बबी रबसनले मलाई भेटेर तपाईँले जे गर्नुपर्ने त्यही गर्नुभयो, तर लाईन्सम्यान गैरजिम्मेबार रहे भने ,’ नासेरले भने ।
