काठकाण्डौं– जबरजस्ती करणी उद्योग गरेको आरोपमा पक्राउ परेका सम्मरीमाई गाउँपालिकाका अध्यक्ष जितेन्द्रनाथ शुक्ला ‘बब्लु’लाई प्रहरीले तीन दिनका लागि रिमान्डमा राखेको छ ।
जिल्ला प्रहरी कार्यालय रूपन्देहीले घटनाको थप अनुसन्धानका लागि भन्दै आरोपित शुक्ललाई रूपन्देही जिल्ला अदालतको आदेशमा पहिलो पटक तीन दिनको रिमान्डमा राखेको हो ।
जिल्ला प्रहरी कार्यालय रुपन्देहीको प्रहरी टोलीले उनलाई जबरजस्ती करणी उद्योग गरेको आरोपमा बिहीबार २८ गते दिउँसो ३ बजेको समयमा गाउँपालिकाको कार्यालय जिगिनाबाट पक्राउ गरेको थियो ।
सम्मरीमाई गाउँपालिका वडा नम्बर १ पकडिहवाकी एक महिलाले बुधबार २७ गते अध्यक्ष शुक्लाविरुद्ध उजुरी दिएकी थिइन् ।
वडा नम्बर ६ असुरैनास्थित आफ्नो निवासमा बोलाएर गाउँपालिका अध्यक्षसमेतका व्यक्तिले जबरजस्ती करणी उद्योग गरेको पीडित महिलाको आरोप छ ।
पीडितका अनुसार घटनाका अर्का आरोपी असलम खान फरार रहेको बताइएको छ । आरोपित खान अध्यक्ष शुक्लका स्वकीय सचिव हुन् ।
